Cristoforo Puddu

Sinnos e feridas in cara

acrarant assutos ogros de lagrimas

e trainos mannantiales de dolore

cugutant sa niedha carena.

In coro at sambenantes craos

e sa rughe abbratzat;

unu pessamentu mudu de atitidu

illacanat dae s'animu

e carpit donzi cussentzia umana.

Sa mama 'e su mortu

istringhet vida e morte

cun s'atraessu de bisos apeutados

e sa malasorte de anzone

perdidu dae s'ama.

E s'addolimada anima sarda

at matessi pena a Gaza, a Kiev e Teheran.